blog en langue corse

    A malacella

In lu silenziu pagnu

Di a notte d’invernu

Burula u so lagnu

Tristu gridu d’infernu………..

A malacella maladetta

Predicia a malasorte.

Era per l’omu in vindetta

L’acennu di a malamorte…………

Nant’à u tettu murtuariu

L’acellu tristu hà cantatu.

U prete recita un rosariu

Pè u vichjone inuliatu………….

Ma quandu un zitilettu

Ùn vole più campà,

Ella, si sceglie un altru tettu

È un vole più cantà………….

Hè spaventata da u focu

Teme a luce di u ghjornu

È pè piattassi in’un locu

Scopre sempre un neru scornu.

                  Parole di Ziu Mimì

                 Articulu  10       

Chi sò venuti à fà, ind’è noi i ghjenuvesi ?               

                     E innanzu à elli ?         

I grechi è i rumani

I saracini è i pisani.

Poi sò vinuti i ghjenuvesi

Gattiva  roba di scalzacani.

U peghju ùn hè d’esse francesi

Quandu dumane saremu corsi

L’omi saranu tutti cinesi

Vani saranu i nò discorsi.

   Quassù in l’arbaghju, cù e  me capre,  u me sumere « Runcone »,

è u me ghjagaru « Cincinu » aviamu fattu a « Republica Corsa

di Quercitana ». Mai nimu pè fà a legge! Runcone era ministru

di i trasporti, Cincinu cù a so manera di riceve a gente era                      

quellu di l’accuglienza, è eiu, sempre fucile in manu quellu di

a guerra dichjarata à e parnice, e volpi è i cignali.

                           Ziu Mimi

 Nantu’à  Google,  aghju scrittu un situ pè quelli chì anu tempu à perde:

    ” corse album paysages”

    Articulu 09

   A  MUNTAGNERA…A u mese di ghjugnu era tempu par me di cullà u me brancu in l’arbaghjolu supranu. L’andatu era cunnisciutu da tutte e me capre è cusi u me ghjagaru pudia corre in la machja pè anasa e parnice. Aghju sempre vistu  « a punta migliarella » bianca di neve à u fà di stu mese. Ci  vulia una ghjurnata sana pè ghjunghje quassù.  

               A strada

     L’andatu caprunu colla          

    Serpighjendu sin’à la cima     

    Frà a machja muntagnola    

    Dighjà fiurita cum’è prima.               

             In lu celu     

   Codifurcutu è maestosu     

   Un filanciu  boga tondu       

   E u  falchettu  silenziosu      

   Ariula da cima à fondu.              

              In la notte  

   U sole ciotta , lentu lentu   

   U neru celu sarà in dolu  

   M’addurmentu quandu  sentu  

   Fischjulà u rusignolu   

               In la mandria   

  In la notte fresca è serenna   

  Un si sente una tintenna.   

   Sò tutte à dorme, in lu stazzu.   

   Dumane andaranu à pasce  

   L’arba croscia da u guazzu,  

   L’arba grassa chi rinasce.                                           

                                           Ziu Mimi                                                                                                                                                                                                                                                                                                                                                                                                                                                                                                                                                                                                                              

     Articulu 07

      U CASTAGNU DI ZIU MIMÌ

                  A  SO VITA                                               

Un chiribizzu di a natura                                        

In la cima di a muntagna                                      

L’ hà fattu nasce tropp’ in altura                        

À cant’à u nidu di l’altagna.                               

Cusì, in la so vita oscura,                                 

Un feci mai una castagna.   

                A SO MORTE

Frasche seche, legnu neru

Tama scurzata dà i venti,

Dopu a vita è i turmenti,

A vichjaia è l’addisperu,

À luna vechja, in la timpesta

Hè mortu solu nant’à a cresta. 

                   ………Ziu Mimì                         

Sò un vechju pastore chi scrive in corsu cù a piuma di una

gallina corsa. Aghju passatu u me  certificatu quand’ eru

 zitellu, po dopu sò andatu à a scola muntagnola……

        Ditemi qualcosa…

Osinnò, cume u me castagnu, aghju da more solu.

                       Ziu  Mimì…..

  Article 6

      In li tempi, certe donne in paese andavanu à a funtana pè empie a cerra è pè chjachjerà ….” u furnaru hè curnutu…. Prete Simone chjava a so serva… Anghjulina hà fattu l’ovu…. Mimi hè un veru scalzacane” …etc… Avianu u fele in bocca, a lingua furcuta è u diavule sott’ à  e gunnelle…   Tandu era una manera di blogà ! A vi dicu, oghje se vo scuntrate sta gente strana hè megliu di suità u vostru sumere….

Ma s’ellu vi piace di scrive in corsu, vi pregu di participà à u me “blog” dopu avè lettu e me sturiette nant’à Google: ”corse album paysages” 

                                  Amicizia….. Ziu  Mimi …

  Articulu  05

A chjama di ziu Mimi

Corciu di me ! Ancu a me vacca hè vinuta à dimi :  ” i vechji ùn anu micca u drittu di blogà. Eppo chi malizia di vulè scrive in corsu ciò chi si pò dì mughjendu “.

Una vita sana à campà solu in ” l’Arbaghjolu  supranu “, tandu pudiu parlà à u me ghjagaru  è à l’acelli. Oghje , mi pare ch’è i web-aghjoli corsi ùn voglinu discorre cù mecu. Hè cusi ! Nimu ùn vole leghje e me sturiette nant’à Google :

         ”corse album paysages”

……………………………………………………………………….

              Solu, solu

       Tuttu una vita à campà solu             

       Era forse u me distinu.                       

       Di a muntagna sò figliolu                    l

       Era forse u me caminu.                       

                                   Parole di ziu Mimi…..

   Articulu 04

A stretta….                                                 Ziu Mimi si ricorda…

Quantu volte escendu di scola, avemu falatu su chjassu  à trunchera di collu pè andà à rubbà in li chjosi di u paese, noce, nucelle, mele mature è uva pisanna. …..Suvente ziu Simone sedutu nant’à u so puntinu, briunava :

       - Manza di circatachji ! se vi pigliu in lu me chjosu avete dà tastà a me trappetta.

Di  ritornu, pè  mettelu  in  stizza,  lampavamu  runziconi  di  mele  nant’à  a  piazza è cantavamu  :

                                                      In lu chjosu di ziu Simone

                                                      Ùn ci’hè bisognu di furcine

                                                      Pè magnà senza permissione

                                                      Pignotti merzi è pere purcine. 

                                                                     Ziu Mimi….

Pudete leghje i me scritti nant’à  Google : ” corse album paysages”

  Articulu 03

Sta notte aghju fattu un sugnacciu. Una manza di murtuloni, goffi, musgingati, rugnicavanu davanti à u ma lettu è ballavanu un ” Sbarcafiume” indiavulatu. O ! Chì paura ! Eppo dopu mi vulianu parlà in latinu. Ohimè ! Un aghju capitu nulla. À mezanotte, mi sò arrittu pà leghje u me blog. Eranu quì, tutti, acciuciulati, bavacciulosi, curnuti, schifosi, è ci sò sempre..

Stu blog cummencia à guastami a vita ma mancu par more, ùn vulariu smettelu…

Pudete leghje i me scritti nant’à Google :”corse album paysages”

                     Ziu Mimi 

      Articulu 02

U me sumere chi si chjama “Runcone” mi dice sempre trinnichendu u capu : ” O ! Ziu Mimi, squassatemi stu “blog” è vinite à discorre cù megu…. Sò un sumiracciu ma possu ragiunà è parlà cù l’oghji è cù l’arechje”.

Anch’ellu hà pigliatu à so ritirata. L’annu scorsu hà trascinatu l’ultima soma di legnu di a so vita. Ùn corre più pè i chjassi, scanza e scatapechje è in quanta me, cerca a cumpagnia nant’à u stradone di u paese.  

Pudete leghje e me sturiette  nant’à  Google :

                  “Corse album paysages”

                            Ziu Mimi ….

   Articulu 01

Oghje certi citadini parlanu una lingua ch’ùn hè micca quella di a me minnana. In li tempi in paese, u vechju pastore cuntava fole à i zitelli, u mulatteru ghjestimava in corsu, è sgiò curatu ùn  parlava francese, a dumenica, cà e donne di u cuntinente. Quandu u nostru maestru scuzzulava i so sculari, tandu alzava a voce mischjendu e due lingue.

 Pudete leghje e me sturiette nant’à  Google : 

 ”corse album paysages”  

 Dopu, ditemi s’è u vechju cucumeru ch’è sò divintatu à uttant’anni  hà dinò qualcosa à dì à i giuvanotti d’avà.

                     Anch’eiu sò un “web-aghjolu”

                    Aghju a voglia di “blogà”

                    Cusì ùn saraghju micca solu

                    Cu a me brama di ghjugà.

                                                                                            Parolle di ziu Mimi

                   Sò un vechju pastore chi aspetta a so ritirata dà u signore.